Tá Treoir Ullmhúcháin do Stoirmeacha á seoladh ag Comhairle Chontae na Gaillimhe ar theacht an gheimhridh
- 70 suíomh san áireamh i Líonra Ionad Tacaíochta Pobail
- 3,600 tona salainn i dtaisce do bhóithre geimhridh na Gaillimhe
Tá Treoir Ullmhúcháin do Stoirmeacha nua seolta ag Comhairle Chontae na Gaillimhe mar chuid dá hullmhúcháin d’aimsir gharbh an tséasúir geimhridh seo amach romhainn, le líonra 70 Ionad Tacaíochta Pobail ar fáil ar fud fad an chontae chun tacú le pobail i rith éigeandálaí móra.
Deartar an treoir chun cabhrú le teaghlaigh ullmhú d’fhadhbanna ar nós bristeacha leictreachais ar feadh tamall fada, cur isteach ar thaisteal agus éaradh seirbhísí uisce agus seirbhísí riachtanacha eile. Leagtar amach inti freisin na tacaíochtaí atá ar fáil do dhaoine nuair a chuireann an drochaimsir isteach go mór ar an saol.
Bunaíodh an Líonra Ionad Tacaíochta Pobail ar fud an Chontae tar éis Stoirm Éowyn agus cuirtear struchtúr ar fáil leis ina bhféadann an t-údarás áitiúil obair le pobail áitiúla nuair atá daoine buailte go dona ag imeachtaí móra drochaimsire.
Tá spás mór téite ag gach ionad ina bhféadfaidh daoine teacht le chéile, le suíocháin, saoráidí cistine le bia agus deochanna bunúsacha a chur ar fáil, leithris, fearas garchabhrach, Wi-Fi, saoráidí luchtaithe gléasanna agus seomra príobháideach nó spás breise nuair is gá. Tá saoráidí breise ar fáil i mórán ionad freisin ar nós cithfholcadán, carrchlós, gineadóirí agus saoráidí inrochtana.
Tá cóipeanna clóite den Treoir Ullmhúcháin do Stoirmeacha ar fáil i mBéarla, Gaeilge agus Úcráinis i ngach ceann de na 29 brainse leabharlainne poiblí ar fud na Gaillimhe, in oifigí na gcúig Cheantar Bhardasacha agus ag Áras an Chontae. Tá an treoir ar fáil freisin ag www.galway.ie.
Dúirt Cathaoirleach Chomhairle Chontae na Gaillimhe Andrew Reddington, gur dearadh an treoir chun cabhrú le daoine ullmhú don drochaimsir ag eolas a thabhairt dóibh maidir leis na tacaíochtaí atá ar fáil dóibh.
“Is rud tábhachtach é an t-ullmhúchán in aghaidh imeacht mór drochaimsire. Leis an treoir sin, cuirtear comhairle phraiticiúil ar fáil do bhristeacha cumhachta, cur isteach ar thaisteal agus tionchair eile, agus léirítear na tacaíochtaí atá ar fáil do dhaoine agus do phobail. Trí chéimeanna simplí a thógáil roimh ré, is féidir difríocht mhór a dhéanann nuair a bhuaileann drochaimsir”
Dúirt Príomhfheidhmeannach Chomhairle Chontae na Gaillimhe, Liam Conneally, go bhfuil ról tábhachtach ag Comhairle Chontae na Gaillimhe i seirbhísí éigeandála, grúpaí pobail agus eagraíochtaí eile in ullmhú d’éigeandálaí aimsire sa todhchaí.
“Spreagfainn teaghlaigh agus gnólachtaí ar fud an Chontae cuairt a thabhairt ar www.galway.ie agus taithí a fháil ar an bhfaisnéis thábhachtach sa Treoir Ullmhúcháin do Stoirmeacha, chomh maith leis an réimse tacaíochtaí agus seirbhísí atá ar fáil i rith cásanna éigeandála.”
“Trí ullmhúcháin a dhéanamh roimh ré, is féidir difríocht shuntasach a dhéanamh nuair a bhuaileann drochaimsir pobail agus seirbhísí riachtanacha.”
Dúirt Stiúrthóir Seirbhísí Chomhairle Chontae na Gaillimhe, Michael Owens, gur féidir le teaghlaigh roinnt céimeanna simplí a thógáil chun ullmhú do dhrochaimsir.
“Ba cheart do dhaoine súil a choinneáil ar fholáirimh aimsire, fóin agus pacaí cumhachta a luchtú, tóirsí agus raidió ceallra a bheith ar fáil, rudaí lasmuigh a dhaingniú agus silteáin agus draenacha a sheiceáil. Spreagaimid daoine comhairle éigeandála a leanúint, taisteal neamhriachtanach a sheachaint agus tosaíocht a thabhairt dá sábháilteacht.”
“Spreagfainn daoine clárú le seirbhís MapAlerter na Comhairle, rud a chuireann foláirimh thábhachtacha ar fáil i rith drochaimsire agus bíonn sé luachmhar go háirithe do dhaoine siúd a mhaireann i gceantair iargúlta, daoine scothaosta agus daoine a mhaireann leo féin.”
Dúirt Comhordaitheoir Ionad Tacaíochta Pobail, Theresa Donohue, go mbeidh ról tábhachtach ag an Líonra Ionad Tacaíochta Pobail ar fud an Chontae i rith imeachtaí drochaimsire.
“Tá go leor ceachtanna foghlamtha ó Stoirm Éowyn maidir leis an gcaoi ar féidir leis an údarás áitiúil agus an pobal áitiúil obair i dteannta le chéile chun sábháilteacht agus leas an phobail a chosaint níos fearr i rith éigeandálaí drochaimsire.”
“Tá ár líonra ionad tacaíochta pobail ina chuid thábhachtach den chur chuige sin agus cuirtear struchtúr ar fáil leis trína bhféadfaidh pobail tacaíocht a thabhairt do dhaoine nuair a atá cur isteach suntasach ann.”
Tá Comhairle Chontae na Gaillimhe freagrach as cóireáil gheimhridh ar thart ar 1,300km de bhóithre ar fud an chontae, a bhfuil thart ar leath acu siúd ina mbealaí Tosaíochta 1 agus 2 agus bóithre straitéiseacha agus bóithre náisiúnta ina measc den chuid is mó.
Déantar cóireáil ar bhealaí Tosaíochta 1 agus 2 nuair atá sioc geallta, agus déantar cóireáil ar bhealaí Tosaíochta 3, atá ina mbóithre réigiúnacha go príomha, i rith drochaimsir níos measa. Tá sé de chuspóir ag an gComhairle na cóireálacha maidine a chríochnú faoi 8 am.
De réir na Comhairle tá toilleadh stórála taobh istigh do thart ar 3,600 tona salainn aici, agus déantar stoic a athshlánú de réir mar is gá i rith an gheimhridh.
Le haghaidh tuilleadh eolais maidir leis an Treoir Ullmhúcháin do Stoirmeacha, tabhair cuairt ar www.galway.ie nó seol r-phost communitysupportcentres@galwaycoco.ie.