Madraí Fáin agus Ar Iarraidh

Is fadhb choitianta iad madraí ar strae agus ar iarraidh i go leor pobal, agus is minic a eascraíonn siad as tréigean, éalú de thaisme, nó easpa aitheantais chuí.     Is é beartas Chomhairle Chontae na Gaillimhe a chinntiú go ndéantar gach iarracht chun gach madra fáin nó nach dteastaíonn a thagann faoinár gcúram a athlonnú.    

Madraí Fáin:

Is madra é ‘madra fáin’ atá in áit phoiblí agus nach bhfuil in éineacht lena úinéir nó le duine freagrach eile.    Is féidir le duine údaraithe madraí fáin a urghabháil agus a choinneáil ar feadh 5 lá agus le linn na tréimhse sin féadfaidh a n-úinéirí iad a athghabháil nó athlonnú a dhéanamh orthu má tá siad oiriúnach le haghaidh athlonnú.   Tabhair faoi deara le do thoil go bhfuil sé mídhleathach madra fáin a thabhairt do dhuine ar bith seachas an t-úinéir, an Maor Madraí, nó an Garda Síochána. 

Má thagann tú ar mhadra fáin: 

• Má tá sonraí an úinéara ar an gcoiléar nó ar an gclib, tabhair ar ais don úinéir é.
• Mura féidir leat an t-úinéir a aimsiú, déan teagmháil le do Mhaor Madraí áitiúil.

Is féidir leat madra fáin a choinneáil, ach ní mór duit fógra i scríbhinn a thabhairt don Mhaor Madraí nó don Gharda áitiúil.  Mura n-éilíonn an t-úinéir an madra laistigh de bhliain, is tusa a bheidh i d'úinéir. 

Má théann do mhadra ar iarraidh, nó má ghoidtear é: 

• Déan é a thuairisciú láithreach don Gharda Síochána, don Mhaor Madraí agus do do thréidlia.
• Scaip an scéal ar na meáin shóisialta – cuir grianghraif shoiléire agus cur síos mionsonraithe ar an madra suas agus spreag daoine chun an post a roinnt.
• Chomh maith leis sin, cuir suas é ar aon láithreáin ghréasáin le haghaidh ainmhithe atá ar iarraidh agus déan monatóireacht ar láithreáin ghréasáin díolacháin chun a fháil amach an bhfuil madraí ar díol a mheaitseálann cur síos do mhadra.   

Conas madra a thabhairt suas: 

Mura féidir leat aire a thabhairt do mhadra a thuilleadh, is féidir é a thabhairt don Mhaor Madraí áitiúil.   Ní mór duit ceadúnas madra bailí a thaispeáint agus beidh táille €50 in aghaidh an mhadra i bhfeidhm.