Galway County Council

Inis Oírr – Buaiteoirí Mórtas Ceantair na nOileán

Pobail bhródúla ba ea Inis Oírr agus Leitir Fraic nuair a ghnóthaigh siad Dámhachtainí Mórtas Ceantair ag searmanas fleáchais i mBaile Átha Troim i gContae na Mí oíche Shathairn seo caite.  Bhí an dá phobal seo a bhuaigh duais i measc na dtrí phobal a bhí ainmnithe ag Comhairle Contae na Gaillimhe le hionadaíocht a dhéanamh ar son an chontae i gcomórtas Mórtas Ceantair na bliana seo:

1. Inis Oírr faoi Chatagóir na nOileán
2. Leitir Fraic faoin gCatagóir, Daonra 0-200
3. AIT RAPID* Thuama faoin gCatagóir, Freagairt an Phobail ar an Dífhostaíocht  

Comórtas uile-oileáin is ea comórtas Mórtas Ceantair na hÉireann atá faoi stiúradh údaráis áitiúla ó thuaidh agus ó dheas ón teorainn i gcomhar le Co-Operation Ireland agus a thugann aitheantas d’fheabhsúcháin agus do ghníomhartha a dhéanann pobail áitiúla le mórtas ceantair a chur chun cinn ina bpobal.

Bhí Méara an Chontae, an Comh. Jimmy McClearn agus an Bainisteoir Contae, an tUasal Martina Moloney, i láthair ag an searmanas dámhachtainí lena gcuid tacaíochta a thabhairt do na hainmnithe uile.  Dúirt an Méara McClearn, “Táim bródúil as na hainmnithe uile mar go léiríonn sé dílseacht agus rannpháirtíocht mórán daoine ar fud an chontae a thugann a gcuid ama dá bpobal.  Táim an-bhródúil as Inis Oírr agus as Leitir Fraic go háirithe as ar bhain siad amach dá bpobal.  Ba mhaith liom comhghairdeas a dhéanamh le muintir Thuama freisin as freagairt a bpobail ar an dífhostaíocht trí oibriú le GMIT ar fhorbairt an Ardteastais i bhFiontar, agus cé nach raibh an oíche leo, is cinnte go raibh ainmniúchán tuillte go maith acu.   

Fógraíodh pobal Inis Oírr mar Bhuaiteoir na hÉireann i gcatagóir na nOileán.  Bhronn Cathaoirleach Co-Operation Ireland, Christopher Moran agus an tAire Iompair, Noel Dempsey, T.D., an dámhachtain a ghlac Áine Uí hAlmhain, Gráinne Ní Chonghaile, Paddy Crowe agus Méara an Chontae, an Comh. Jimmy McClearn ar son Phobal Inis Oírr.

Bhí an méid seo a leanas le rá ag an bpainéal breithnithe i leith bhronnadh na duaise iomláine faoi chatagóir na nOileán ar Inis Oírr:  “Is an-speisialta go deo na héachtaí atá bainte amach le haghaidh fheabhsú an phobail ar an oileán seo. Rinneadh feabhsúcháin mhóra ar an mbonneagar agus ar na gnéithe sóisialta, geilleagracha agus cultúrtha de shaol an phobail faoi cheannaireacht grúpa áitiúil fuinniúil. Tá fís ríshoiléir ag an ngrúpa seo ar na riachtanais bunaithe ar thaighde leanúnach fónta agus tá na hardaidhmeanna á mbaint amach de réir a chéile. Ní hamháin go ndeachaigh a dtiomantas agus a ndiongbháilteacht i gcion ar na moltóirí, ach ba é a a gcur chuige fonnmhar i dtaca le baint amach a gcuid aidhmeanna is mó a chuaigh i bhfeidhm orthu.  Bhíomar an-sásta duais na chéad áite a bhronnadh orthu faoi chatagóir na nOileán 2010.”     

Dúirt an Méara an méid seo a leanas faoi Inis Oírr agus faoi dhuais na nOileán a bhain siad, “Éacht iontach í agus tá an-fhonn orm aitheantas a thabhairt di ar son na Comhairle seo. Tá an duais tuillte acu as obair chrua chomhsheasmhach mhuintir Inis Oírr ar fad, go háirithe na daoine sin a d’oibrigh ó dhubh go dubh chun tionscnaimh phobail a chothú agus a fhorbairt le tríocha bliain anuas. Ba mhaith liom ómós a thabhairt d’Áine Uí hAlmhain, do Paddy Crowe agus dóibh siúd uile a ghníomhaigh mar Ghrúpa Áitiúil Comhordaithe.  Déanaim comhghairdeas le bunadh Inis Oírr agus guím gach rath orthu amach anseo. Tá Comhairle Contae na Gaillimhe ag tnúth go mór le leanúint ar aghaidh ag tairiscint tacaíochta agus cúnaimh chun tionscnaimh amach anseo a chur chun cinn trí oibriú le chéile ar son leas phobal an oileáin seo.“

Ainmníodh Leitir Fraic as a n-iarrachtaí le freagairt ar athrú ina bpobal agus le seirbhísí a chur ar fáil don phobal go léir.   Bronnadh an dara háit ar Leitir Fraic faoin gcatagóir, Daonra 0-200 agus ghlac Breda Conneys, Ann Pollington, Samantha Flaherty agus Méara Chontae na Gaillimhe, an Comh. Jimmy McClearn, an duais seo ar son a bpobail.

 *AIT RAPID Athbheochan Ceantar trí Phleanáil, Infheistíocht agus Forbairt – An Fhoireann um Fheidhmiú Ceantair

Le tuilleadh faisnéise a fháil déan teagmháil le    

Shane Ó’ hEithir

Oifigeach Foirne,

Forbairt Pobail, Fiontair agus Eacnamaíochta

Fón póca: (087) 2463428

Teil: (091) 476502  Facs: (091) 779082

R-phost: soheithir@galwaycoco.ie

Tagairt do Mhórtas Ceantair     www.prideofplace.cooperationireland.org/